It-tisħiħ tal-parteċipazzjoni demokratika, l-għoti tas-setgħa liċ-ċittadini u t-trawwim tal-inklużjoni taċ-ċittadini fl-UE
Id-demokraziji jiddependu fuq il-parteċipazzjoni taċ-ċittadini tagħhom. Iċ-ċittadini tal-UE qed isiru dejjem aktar konxji tad-drittijiet mogħtija lilhom miċ-ċittadinanza tal-UE, u qed jużawhom. Pereżempju, qed jagħmlu użu dejjem akbar mid-drittijiet elettorali tagħhom.
| >80% | taċ-ċittadini tal-UE jafu d-drittijiet tagħhom taċ-ċittadinanza tal-UE. |
 |
| +5 p.p. | żieda fil-parteċipazzjoni fl-elezzjoni għall-parlament tal-UE tal-2019 mill-2004. Il-parteċipazzjoni fl-elezzjonijiet tal-2019 għall-Parlament Ewropew laħqet l-ogħla livell f’25 sena, xprunata minn votanti żgħażagħ u dawk li vvutaw għall-ewwel darba u żieda fil-parteċipazzjoni tan-nisa. |
 |
Madankollu, iċ-ċittadini tal-UE jemmnu li għandu jsir aktar biex jiġu infurmati dwar id-drittijiet tagħhom taċ-ċittadinanza tal-UE, pereżempju, permezz ta’ kampanji ta’ sensibilizzazzjoni.
| >60% | taċ-ċittadini tal-UE jaħsbu li mhux qed isir biżżejjed biex jiġu infurmati dwar id-drittijiet tagħhom taċ-ċittadinanza tal-UE skont il-Konsultazzjoni Pubblika dwar id-Drittijiet taċ-Ċittadinanza tal-UE 2020. |
 |
Sabiex issaħħaħ id-demokrazija, l-għoti tas-setgħa liċ-ċittadini u l-integrazzjoni tagħhom, il-Kummissjoni Ewropea se tieħu l-azzjonijiet li ġejjin:
-
1
Taġġorna r-regoli tal-UE dwar id-drittijiet tal-vot fl-elezzjonijiet muniċipali u Ewropej
Il-Kummissjoni se taġġorna d-direttivi dwar id-drittijiet elettorali taċ-ċittadini mobbli tal-UE fl-elezzjonijiet muniċipali u Ewropej. Dan ikun jinvolvi r-reviżjoni, il-kjarifika u t-tisħiħ tar-regoli sabiex jiġi żgurat li dawn jappoġġaw il-parteċipazzjoni wiesgħa u inklużiva taċ-ċittadini mobbli tal-UE.
-
2
Taħdem aktar mill-qrib man-Network Ewropew ta’ Kooperazzjoni dwar l-Elezzjonijiet
Il-Kummissjoni se taħdem mal-Istati Membri permezz tan-Network Ewropew ta’ Kooperazzjoni dwar l-Elezzjonijiet biex tiffaċilita u ttejjeb l-eżerċitar tad-drittijiet elettorali taċ-ċittadini tal-UE.
-
3
Tappoġġa osservazzjoni indipendenti tal-elezzjonijiet
L-osservazzjoni tal-elezzjonijiet hija mod tajjeb biex iċ-ċittadini jiġu involuti fil-proċess elettorali, u biex titjieb il-fiduċja tal-pubbliku f’elezzjonijiet ħielsa u ġusti. Il-Kummissjoni se tiffinanzja proġetti dwar l-osservazzjoni indipendenti tal-elezzjonijiet, inkluż miċ-ċittadini.
-
4
Tappoġġa d-demokrazija deliberattiva u l-innovazzjoni tal-parteċipazzjoni taċ-ċittadini fil-proċess leġiżlattiv tal-UE
Iċ-ċittadini li jingħataw is-setgħa għandu jkollhom l-għodod, il-mezzi u l-ħiliet biex isemmgħu leħinhom fix-xena pubblika sabiex ikunu jistgħu jikkontribwixxu direttament għat-tfassil tal-politiki pubbliċi fil-livelli kollha. Il-Kummissjoni se tieħu approċċi innovattivi biex tinvolvi l-parteċipazzjoni attiva taċ-ċittadini fil-proċess leġiżlattiv biex tiżgura li l-liġijiet tal-UE jkunu adattati għall-iskop tagħhom u jallinjaw mal-valuri tal-UE.
-
5
Tappoġġa l-inklużjoni taċ-ċittadini tal-UE fis-soċjetà tal-UE
Il-Kummissjoni se tiffinanzja azzjonijiet lokali speċifiċi li għandhom l-għan li jappoġġaw l-inklużjoni taċ-ċittadini tal-UE fis-soċjetà tal-UE permezz tal-programm dwar iċ-Ċittadini, l-Ugwaljanza, id-Drittijiet u l-Valuri.
-
6
Tqajjem kuxjenza dwar l-importanza tal-parteċipazzjoni kulturali għas-soċjetà u għad-demokrazija
Il-Kummissjoni se tqajjem kuxjenza madwar l-UE dwar l-importanza tal-parteċipazzjoni fil-kultura għas-soċjetà u għad-demokrazija permezz ta’ azzjonijiet immirati inkluż il-finanzjament.
Trid issir taf aktar dwar id-demokrazija, l-għoti tas-setgħa u l-inklużjoni?
Faċilitar tal-eżerċitar tal-moviment liberu u simplifikazzjoni tal-ħajja ta’ kuljum
Il-libertà tal-moviment, li tippermetti lil kwalunkwe ċittadin tal-UE li jgħix, jaħdem jew jistudja fi kwalunkwe Stat Membru, hija d-dritt li huwa l-aktar għażiż għaċ-ċittadini tal-UE.
| 13.3M | stima tan-numru ta’ ċittadini tal-UE li eżerċitaw dan id-dritt u marru jgħixu fi Stat Membru ieħor. |
 |
| 20% | minn dawk li wieġbu għall-Konsultazzjoni Pubblika dwar id-Drittijiet taċ-Ċittadinanza tal-UE 2020 kienu jgħixu fi Stat Membru wieħed u jaħdmu f’ieħor. |
 |
| >80% | taċ-ċittadini tal-UE kienu jaħsbu li l-moviment liberu fi ħdan l-UE jġib benefiċċji ġenerali għall-ekonomija ta’ pajjiżhom. |
 |
| 3.7M | stima taċ-ċittadini tal-UE li jgħixu fir-Renju Unit. Brexit kellha impatt sinifikanti fuq dawn iċ-ċittadini tal-UE. |
 |
Madankollu, li wieħed imur jgħix f’pajjiż ieħor xorta jista’ jinvolvi għadd ta’ sfidi legali u amministrattivi. Il-Kummissjoni Ewropea tappoġġa lill-Istati Membri u liċ-ċittadini tal-UE fl-indirizzar ta’ dawn il-kwistjonijiet billi tieħu l-azzjonijiet li ġejjin:
-
7
Taġġorna l-linji gwida tal-UE dwar il-moviment liberu
Il-Kummissjoni se taġġorna l-linji gwida tal-UE dwar il-moviment liberu biex iqisu d-diversità tal-familji (il-familji qawsalla) u l-applikazzjoni tal-miżuri introdotti minħabba t-tħassib dwar is-saħħa pubblika. Il-Linji Gwida tal-2009 offrew informazzjoni u assistenza kemm lill-Istati Membri kif ukoll liċ-ċittadini tal-UE dwar il-kwistjonijiet identifikati bħala problematiċi fl-eżerċitar tal-moviment liberu għaċ-ċittadini tal-UE.
-
8
Tipproteġi d-drittijiet taċ-ċittadini tal-UE li jgħixu fir-Renju Unit
F’konformità mal-Ftehim dwar il-Ħruġ, il-Kummissjoni se tkompli tappoġġa l-protezzjoni tad-drittijiet taċ-ċittadini tal-UE li, bħala riżultat tal-eżerċitar tad-dritt tagħhom għall-moviment liberu filwaqt li r-Renju Unit kien għadu membru tal-UE, kienu residenti fir-Renju Unit qabel it-tmiem tal-perjodu ta’ tranżizzjoni.
-
9
Tippromwovi l-inklużjoni ta’ soluzzjonijiet transfruntiera tal-gvern elettroniku u tan-negozju elettroniku f’karti tal-identità li jkunu għadhom kif inħarġu
Il-Kummissjoni se taħdem mal-Istati Membri biex tippromwovi l-inklużjonijiet ta’ soluzzjonijiet transfruntiera tal-gvern elettroniku u tan-negozju elettroniku f’karti tal-identità li jkunu għadhom kif inħarġu.
-
10
Tissimplifika l-obbligi tat-taxxa għaċ-ċittadini tal-UE
Il-Kummissjoni beħsiebha toħroġ rakkomandazzjonijiet biex ittejjeb is-sitwazzjoni tal-kontribwenti b’attivitajiet transfruntiera, inklużi l-ħaddiema fruntaliera.
-
11
Tappoġġa l-iżvilupp ta’ pjanifikaturi tal-vjaġġi li jinvolvu diversi modi ta’ trasport
Il-Kummissjoni se tniedi inizjattiva biex tappoġġa aktar l-iżvilupp ta’ pjanifikaturi tal-vjaġġi li jinvolvu diversi modi ta’ trasport, kif ukoll servizzi diġitali li jiffaċilitaw il-prenotazzjoni u l-ħlas tal-offerti differenti ta’ mobilità.
Trid issir taf aktar dwar il-moviment liberu?
Protezzjoni u promozzjoni taċ-ċittadinanza tal-UE
Iċ-ċittadinanza tal-UE u d-drittijiet assoċjati tagħha huma simbolu tal-identità Ewropea kondiviża tagħna u l-għarfien li lkoll nappartjenu għal komunità bbażata fuq il-prinċipji tad-demokrazija, l-istat tad-dritt u r-rispett għad-drittijiet fundamentali.
Il-promozzjoni u l-protezzjoni tal-valuri u tal-integrità taċ-ċittadinanza tal-UE huma ta’ importanza kbira – dan jinkludi l-iżgurar li ċ-ċittadinanza ma tiġix imminata jew li d-drittijiet ma jkunux ristretti.
| 37% | taċ-ċittadini tal-UE jħossuhom infurmati dwar x’jistgħu jagħmlu meta d-drittijiet tagħhom bħala ċittadini tal-UE ma jiġux irrispettati. |
 |
| +10M | persuna pparteċipaw f’Erasmus+ (u l-programmi predeċessuri tiegħu) matul l-aħħar 3 deċennji. Dan il-programm għandu rwol importanti fil-promozzjoni taċ-ċittadinanza u tal-valuri komuni tal-UE. |
 |
Il-Kummissjoni Ewropea se tieħu l-azzjonijiet li ġejjin biex tippromwovi u tipproteġi ċ-ċittadinanza tal-UE:
-
12
Tkompli tissorvelja “l-iskemi tal-passaporti tad-deheb” għaċ-ċittadinanza tal-UE u taġixxi kif meħtieġ
Il-valuri u l-prinċipji tal-UE bħas-solidarjetà fost iċ-ċittadini tal-Istati Membri jiddgħajfu jekk il-fatt li wieħed ikun parti mill-proġett Ewropew, it-tgawdija tad-drittijiet tiegħu, u l-parteċipazzjoni fil-ħajja demokratika tiegħu jiġu soġġetti għal sempliċi tranżazzjoni ekonomika. Il-Kummissjoni se tkompli tissorvelja r-riskji maħluqa mill-iskemi tal-investituri għaċ-ċittadinanza tal-UE, inkluż fil-kuntest ta’ proċeduri ta’ ksur li għaddejjin bħalissa, u tintervjeni kif meħtieġ.
-
13
Tipproponi miżuri ġodda ta’ ugwaljanza u ta’ kontra d-diskriminazzjoni, inkluż:
Il-Kummissjoni adottat l-istrateġija tal-UE tal-2020-2025 dwar l-ugwaljanza bejn il-ġeneri, il-pjan ta’ azzjoni tal-UE għall-ġlieda kontra r-razziżmu u l-oqfsa strateġiċi dwar l-LGBTIQ u r-Rom. Il-Kummissjoni se tipproponi miżuri ġodda ta’ ugwaljanza u ta’ kontra d-diskriminazzjoni inkluż:
• Proposta għall-prevenzjoni u l-ġlieda kontra l-vjolenza abbażi ta’ sess u l-vjolenza domestika
• Strateġija dwar id-drittijiet tal-persuni b’diżabilità u Komunikazzjoni dwar l-istrateġija tal-UE dwar il-ġlieda kontra l-antisemitiżmu.
• Inizjattiva biex tiġi estiża l-lista tar-reati tal-UE għall-forom kollha ta’ reati ta’ mibegħda u diskors ta’ mibegħda -
14
Trawwem is-sens ta’ identità Ewropea fost iż-żgħażagħ
Il-Kummissjoni se tappoġġa s-sens ta’ identità Ewropea taż-żgħażagħ Ewropej permezz tal-programm ERASMUS+, il-Programm tal-Korp Ewropew ta’ Solidarjetà u l-Azzjonijiet Jean Monnet.
-
15
Tkompli tissorvelja l-impatt tal-miżuri restrittivi
Il-Kummissjoni se tkompli tissorvelja l-impatt tal-miżuri restrittivi, speċifikament dawk stabbiliti matul il-kriżijiet, fuq id-drittijiet taċ-ċittadinanza tal-UE, l-elezzjonijiet ħielsa u ġusti u dibattitu demokratiku ġust sakemm jitneħħew dawn il-miżuri. Dan se jgħin biex ikompli jiffaċilita l-iskambju tal-Istati Membri tal-aħjar prattiki dwar dawn il-kwistjonijiet fin-Network Ewropew ta’ Kooperazzjoni dwar l-Elezzjonijiet.
Trid issir taf aktar dwar il-protezzjoni taċ-ċittadinanza tal-UE?
Protezzjoni taċ-ċittadini tal-UE fl-Ewropa u f’pajjiżi barranin, inkluż fi żminijiet ta’ kriżi/ emerġenza
Il-pandemija tal-COVID-19 affettwat lill-Ewropej b’modi differenti u enfasizzat u aggravat l-inugwaljanzi eżistenti fis-soċjetà tagħna. Il-pandemija tal-COVID-19 enfasizzat ukoll il-valur tas-solidarjetà fost l-Istati Membri u ċ-ċittadini.
| 7M | ċittadin tal-UE jivvjaġġaw lejn jew jgħixu f’pajjiżi fejn ma għandhomx aċċess għall-protezzjoni konsulari pprovduta mill-pajjiż ta’ oriġini tagħhom. |
 |
| ~90% | ta’ dawk li wieġbu għall-Konsultazzjoni Pubblika dwar id-Drittijiet taċ-Ċittadinanza tal-UE 2020 indikaw li d-delegazzjonijiet tal-UE għandhom jieħdu rwol aktar attiv fl-assistenza liċ-ċittadini tal-UE mhux rappreżentati. |
 |
| +600 | elf ċittadin Ewropew affettwati mir-restrizzjonijiet fuq l-ivvjaġġar minħabba l-COVID-19 inġiebu lura f’pajjiżhom fi sforz ta’ koordinazzjoni bla preċedent tal-UE u tal-Istati Membri tagħha. |
 |
| 70% | ta’ dawk li wieġbu għall-Konsultazzjoni Pubblika dwar id-Drittijiet taċ-Ċittadinanza tal-UE 2020 setgħu jsibu l-informazzjoni li kellhom bżonn dwar il-pandemija permezz tal-istituzzjonijiet nazzjonali u tal-UE, jew permezz tal-midja. |
 |
Il-Kummissjoni Ewropea se tieħu l-azzjonijiet li ġejjin:
-
16
Timplimenta flimkien mal-Istati Membri l-Istrateġija tal-UE għall-vaċċini kontra l-COVID-19
Il-Kummissjoni se timplimenta l-istrateġija tal-UE għall-vaċċini kontra l-COVID-19 flimkien mal-Istati Membri, billi tagħti liċ-ċittadini kollha aċċess rapidu, ekwu u affordabbli għal dawn il-vaċċini. Il-Kummissjoni pproponiet ukoll programm ġdid tal-UE għas-saħħa - EU4Health, li se jappoġġa azzjonijiet għall-protezzjoni taċ-ċittadini fl-Unjoni minn theddid transkonfinali serju għas-saħħa.
-
17
Iżżid l-appoġġ tagħna għaż-żgħażagħ
TIl-Kummissjoni se żżid l-appoġġ tagħha għaċ-ċittadini żgħażagħ tal-UE, inkluż dawk minn gruppi żvantaġġati, biex tgħinhom jaċċessaw l-edukazzjoni, it-taħriġ u finalment is-suq tax-xogħol permezz tal-iskema msaħħa ta’ Garanzija għaż-Żgħażagħ.
-
18
Tirrevedi r-regoli tal-UE dwar il-protezzjoni konsulari
Fl-2021, il-Kummissjoni se tirrevedi r-regoli tal-UE dwar il-protezzjoni konsulari sabiex ittejjeb it-tħejjija u l-kapaċità tal-UE u tal-Istati Membri li jipproteġu u jappoġġaw liċ-ċittadini Ewropej fi żminijiet ta’ kriżi. Dan isaħħaħ il-kooperazzjoni fost l-Istati Membri u jsaħħaħ ir-rwol ta’ appoġġ tal-UE, billi jagħmel l-aħjar użu min-network uniku tiegħu tad-delegazzjonijiet tal-UE biex jipprovdi assistenza konsulari liċ-ċittadini tal-UE f’każ ta’ bżonn, pereżempju, billi jippermettilhom jorganizzaw titjiriet ta’ ripatrijazzjoni u joħorġu dokumenti provviżorji tal-ivvjaġġar.
Trid issir taf aktar dwar il-protezzjoni taċ-ċittadini tal-UE fi żminijiet ta’ kriżi?
Librerija
Għal aktar informazzjoni dwar iċ-ċittadinanza tal-UE, ara:
- Ir-Rapport tal-2020 dwar iċ-ċittadinanza tal-UE
- L-Iskeda informattiva “Riżultati tal-Konsultazzjoni Pubblika dwar id-Drittijiet taċ-Ċittadinanza tal-UE 2020”
- L-Iskeda informattiva “L-għoti tas-setgħa liċ-ċittadini u l-protezzjoni tad-drittijiet tagħhom”
- Ir-Rapport skont l-Artikolu 25 tat-TFUE dwar l-eżerċitar effettiv tad-drittijiet taċ-ċittadinanza tal-UE